Նյու Յորքում խոշոր ավտովթար է եղել, որում հայտնվել են մի քանի տասնյակ մեքենաներ: Դեպքը տեղի է ունեցել Լոնգ-Այլընդի հիմնական ավտոմայրուղու վրա: 25 մեքենաների բախման հետեւանքով մեկ մարդ է զոհվել, եւս 33-ը` տարբեր աստիճանի մարմնական վնասվածքներ են ստացել, բազմաթիվ մեքենաներ այլեւս պիտանի չեն շահագորման համար: Ոստիկանությունն առայժմ չի հայտնել վթարի պատճառների մասին, հայտնի է միայն, որ դեպքի պահին եղանակը բարենպաստ է եղել, իսկ տեսանելիությունը թույլ է տվել վարորդներին արձագանքել իրադարձությանը: Տեղական լրատվամիջոցները նշում են, որ վթարի մեղավորը մեծ թրեյլըրի վարորդն է եղել` Ռոքինգհեմի 42-ամյա բնակիչ Ռեյմընդ Սիմոնոն: Նա կորցրել է մեքենայի կառավարումը եւ անցել մարդատար մեքենաների վրայով: Բլու Փոյնթի 68-ամյա մի բնակչուհի մահացել է իր Տոյոտա Քեմրի մեքենայի մեջ: 33 վիրավորներին տեղափոխել են հիվանդանոց: նրանցից մեկի` 57-ամյա տղամարդու վիճակը ծայրահեղ ծանր է, Stony Brook University Medical Center-ի բժիշկները պայքարում են նրա կյանքի համար: Ռեյմընդ Սիմոնոյին ոչինչ չի եղել, ընդամենը աննշան քերծվածքներ: Ոստիկանությունը հետաքննություն է սկսել, առայժմ ձերբակալվածներ չկան: