Երեկ երեկոյան ԱՄՆ նախագահի թեկնածուներ Բարաք Օբամայի եւ Միթ Ռամնիի միջեւ տեղի ունեցավ երկրորդ բանավեճը: CNN-ի անցկացրած հարցման համաձայն, հեռուստադիտողների 46 տոկոսի կարծիքով հաղթանակ է տարել Օբաման, 39 տոկոսն էլ ձայն է տվել Ռամնիին: Սպասվում է, որ այս հաղթանակը Օբամային զգալի ձայներ կբերի չկողմնորոշված ընտրողների թվից: Բանավեճի 2-րդ ռաունդն անցնում էր Նյու Յորք նահանգի Հեմփսթեդ քաղաքում, որի ընթացքում 82 չկողմնորոշված ընտրող հարցեր էին ուղղում թեկնածուներին: Այս բանավեճում Օբաման կարծես թե հաշվի էր առել հոկեմբերի 3-ի առաջին բանավեճի սխալները եւ բավական ագրեսիվ մարտավարություն էր ընտրել, մեղադրանքներ էր հղում հակառակորդի հասցեին, չէր խուսափում նրան արտաքին եւ ներքին քաղաքականության հարցերում անտեղյակության մեջ մեղադրելուց: Անդրադառնալով երկրի հարկային քաղաքականությանը, նախագահ Օբաման ասել է հանրապետական իր մրցակից Ռամնիին, որ հարուստներին հարկային արտոնությունների տրամադրումը, կավելացնի երկրի բյուջեի պակասորդը եւ ծանր բեռ կդառնա շարքային ամերիկացիների համար: Ռամնին սակայն արձագանքել է՝ մեղադրելով նախագահին հարուստների կողմից վճարվող հարկադրույքը բարձրացնելու ցանկություն ունենալու մեջ եւ նշելով, որ հարկային իր ծրագիրը կհանգեցնի աշխատատեղերի ավելացմանն ու հավասարակշռված բյուջեի ձեւավորման: Նախագահի թեկնածուներն առճակատվել են նաեւ էներգետիկայի եւ ներգաղթի հարցերում: Ռամնին, մասնավորապես նշել է, թե ապօրինի ներգաղթյալներին պետք է զրկել աշխատելու հնարավորությունից, սակայն ԱՄն-ում ծնված երեխաներին պետք է քաղաքացիություն շնորհել: Հիշեցնենք, որ հոկտեմբերի 3-ին առաջին բանավեճի արդյունքում հաղթող էր ճանաչվել Ռամնին:
