Կոլորադոյում օրեր շարունակ մոլեգնող խոշոր անտառային հրահդեն արդեն մի քանի հարյուր տուն է ոչնչացրել: Կոլորադո-Սփրինգսի քաղաքապետը հայտնել է, թե Հետաքննությունների դաշնային բյուրոն արդեն սկսել է հրդեհի բռնկման հանգամանքների հետաքննությունը, քանի որ մտավախություն կա, որ այն միտումնավոր է եղել: Հրդեհի պատճառով 36 հազար մարդ տարհանվել են իրենց բնակավայրերից: Կոլորադո նահանգում բռնկված հրդեհի պատճառով 36 հազար բնակիչ լքել է բնակարանները: Կրակի մակերեսը գնալով ավելի է տարածվում։ Այն այրել է մոտ 15 հազար 500 ակր հող եւ շարժվում է Կոլորադոյի ուղղությամբ։ Հրդեհի պատճառով նաեւ թունավոր ամպեր են գոյացել, որոնք տեղ-տեղ կարող են մահացու լինել: Զանգվածային հրդեհներն անհանգստացնում են Սպիտակ տանը։ ԱՄՆ նախագահ Բարաք Օբաման նախատեսում է հունիսի 29-ին այցելել Կոլորադո նահանգ իրավիճակն անմիջականորեն վերահսկելու համար։ Ըստ օդերեւութաբանների կանխատեսումների, առաջիկա օրերին տարածաշրջանում եղանակը կխոնավանա: Անտառային հրդեհներից գոյացած 40 մետր բարձրությամբ ծխե ամպերը մոտ հազարից ավելի հրշեջների համար լուրջ խոչընդոտ են հանդիսացել փրկարարական աշխատանքներ իրականացնելու ընթացքում։ Վերջին 15 տարվա ընթացքում սա Կոլորադոյում ամենաազդեցիկ հրդեհն է համարվում: Ըստ ստացված տվյալների, մոտ երեք հարյուր մարդ է տուժել հրդեհից եւ տեղափոխվել տեղի հիվանդանոց: Հրդեհները շարունակվում են նաեւ մյուս նահանգներում: Յուտայում այրվել է 19 հազար հեկտար տարածք եւ ոչնչացվել են 56 շինություն, Մոնտանայում մի քանի բնակավայր են տարհանել:
